ريجيمات لكل الاوقات
ريجيم عامة يعنى نظام وريجيم غذائي يعني اتباع نظام معين في الأكل سواء كان في الكمية المأكولة أو الأنواع نفسها أو عدد الوجبات أو مواعيد تناولها.. من الآخر اتباع ريجيم غذائي معناه اتباع نظام معين في التغذية، واللي إنتم ماتعرفهوش إن الريجيم مش شرط يبقى للتخسيس ده ممكن يكون لزيادة الوزن "في حالة إخواتنا النحيفات – اللهم لا حقد ولا حسد"، ومش معناه أبدا إن الواحدة تمارس على نفسها أقصى طرق التعذيب اللي هي طبعا الحرمان من أحلى وألذ متعة أنعم الله بها علينا فاهمينّي طبعا.. "الأكل"، لكن المطلوب منك هو النظام في الأكل.. علشان كده عاوزين نقول ليكِ إن فيه شوية نصائح لازم تتبعيها قبل ما تاخدي القرار "الانتحا...".. إحم إحم "الحكيم" بإنك تعملي ريجيم.. أول حاجة تغيري من عاداتك الغذائية..
ارفعي الشعارات دي
1. لا للرمرمة والتلقيط بين الوجبات.
2. لا للكسل والخمول والرحرحة.
3. لا تراجع ولا استسلام يعني ماتمليش من عدم الوصول للنتيجة اللي إنتِ عايزاها في وقت قليل، بالذمة وزن اكتسبتيه في عشر سنين هتخسريه إزاي في 10 أيام؟
فيه كمان معلومة مهم جدا إنك تعرفيها؛ مش معنى إنك عاملة ريجيم تبقي دبلانة ووشك ضعيف وهتقعي من طولك.. بالعكس المفروض إنك بتاكلي أكل صحي فالطبيعي إنك تبقي في كامل حيويتك ونشاطك، لو حالتك كده واستمرت كده أكتر من أسبوع يبقى إنتِ مابتتبعيش ريجيم مناسب لحالتك الصحية واحتياجاتك الغذائية. آخر حاجة بقى وإنتِ بتنقي الريجيم حاولي تنقي ريجيم تقدري عليه وعلى طعم محتوياته علشان ماتزهقيش؛ لأن ممنوع استبدال حاجة بحاجة في الريجيمات دي إلا فيما ندر. يلاّ هنبدأ الريجيمات.. مستعدة؟
رد مع الاستدلال
الروابط المفضلة